गुजरातमा पुल भत्किँदा १३ जनाको मृत्यु

गुजरात राज्यमा रहेको गम्भीरा पुलको एक भाग महिसागर नदीमा खस्दा कम्तीमा १३ जनाको मृत्यु भएको छ। सञ्चार माध्यमहरूका अनुसार कम्तीमा ४ वटा गाडी नदीमा खसेका छन् । अहिलेसम्म १३ जनाको मृत्यु भइसकेको छ र धेरै जनालाई घाइते अवस्थामा नजिकैका अस्पतालहरूमा लगिएको छ। बुधबार बिहान ७:३० बजेतिर एउटा ट्रक, एउटा भ्यान र एउटा कार पुल पार गर्दै गर्दा यो घटना भएको थियो।

वडोदरा शहरबाट लगभग २५ किलोमिटर टाढा रहेको यो पुल सौराष्ट्र जाने यातायातका सवारी साधनहरूको लागि महत्त्वपूर्ण मार्ग हो। गुजरात सरकारका प्रवक्ता ऋषिकेश पटेलले उक्त पुल सन् १९८५ मा बनेको र बेलाबेलामा मर्मत गरिएको बताएका छन् ।

हाल विदेश भ्रमणमा रहेका प्रधानमन्त्री नरेन्द्र मोदीले गुजरातका मुख्यमन्त्री भूपेन्द्र पटेललाई फोन गरेर परिस्थितिको जानकारी लिए। उनले ज्यान गुमाउनेहरूका परिवारप्रति समवेदना व्यक्त गरे र घाइतेहरूको शीघ्र स्वास्थ्यलाभको कामना गरे।

मृतकका परिवारजनलाई प्रधानमन्त्री राष्ट्रिय राहत कोष (PMNRF) बाट प्रतिव्यक्ति २ लाख रुपैयाँ र घाइतेहरूलाई प्रतिव्यक्ति ५०,००० रुपैयाँ राहत घोषणा गरिएको छ।